عن الهويــــة..إضاءة جانبية

إبراهيم حسن أحمد

ذكــر..مسلـــم..أعزب

دى بيانات البطاقة الشخصية و اللى بتوضح هويتى بصورة رسمية
و بتعكس حقائق لا جدال فيها عنى

موظف السجل المدنى كان آخد تعليمات من النظام السابق
بتصوير المواطنين صور خرة أبيض و اسود
و جزء كبيــر من المواطنين كان بيطلع أحول و فاتح بقه
و شكلنا كان وحش أوى وسط باقى الدول
لما تقابل واحد أمريكانى متصور ألوان و بيضحك
و الشعب كان فاكر دة عيب فى الجينات
و إن المزز لازم يكونوا أجانب

إلا إنه بعد ما قامت الثورة..و اللى ما شاركش فيها إبراهيم
بدأت الجماهير تطالب بتغيير موظف السجل المدنى اللى بيصور لأنه فى الأصل شغال فراش
و تعيين مصور خريج فنون جميلة مكانه

ففوجىء الناس أثناء مطالبهم ببوسترات تملأ الشوارع كتب عليها
نحذر من المساس بخانة النوع فى البطاقة
هيمــة سيظل دكـــر

الناس استغربت..مال دة و مال الصور؟؟
فى ناس تانين خافوا..حسوا ان هيحصل تلاعب فى النوع أو يمكن يتلغى
على القهوة كتر الكلام..واحد تطوع بالشرح لمجموعة و هما بيلعبوا دومينو
-بيقولوا هيغيروا البطايق و هيلعبوا فى خانة النوع
يعنى ممكن عم عبيد يطلع نتاية..أومااااال
-بس انا سمعت انهم مش هييجوا جنبها و هيغيروا بس صورنا اللى زى الزفت دى
-لا يا معلمى فى حرب علينا..دول شواذ و ممكن يعملوا اى حاجة
- لااااااااء..كله الا كدة..أنا دكررررر غصب عن أى حد

و فى ناس تانيين عارفين إنهم دكرة
و إن الرجولة أدب مش هز كتاف
و انها أفعال لا أقــوال..و ان اصلاً خانة النوع مش محل نقاش

المهم..طرح إستفتاء شعبى على تلزيق صورة ألوان على الصورة القديمة مع تغليف البطاقة
مع الإبقاء على نفس البطاقة البطاقة القديمة و نفس الموظف "اللى لما كان حد بيضحك و هو بيتصور بيسبله و يخليه يكشر"
و رفض تعيين مصور محترف من فنون جميلة

ناس كتيرة قالت كدة منبقاش عملنا حاجة..
إحنا عاوزين نغير البطاقة كلها و نعمل بطايق جديدة لانج
و الموظف كمان..إحنا مش عاوزين نرجع لورا تانى

قام هيمة نزل القهوة
و قعد مع الناس..و وضحلهم نظرية إنهم ممكن يكونوا فى البطايق الجديدة ملهومش نوع
و تمشى فى الشارع متعرفش اذا كنت راجل و لا ست
و أمك كمان..أمى أنا؟؟؟ آآآآه أمك انت..

الناس بدأت تقلق
و رفضوا بالطبع حدوث السيناريو دة
فقالوا لمقترح تلزيق الصورة نعععم

و هكذا خلص الموضوع لحين احضار خامات جديدة
و اللى ممكن تكون أسوأ بكتييييير
المهم..ابراهيم عمر ما كانت قضيته البطاقة..
و لا تفرق معاه الخامات..
كل اللى يفرق معاه إنه يتكتب فى البطاقة دكر

مع إنه لو فكر للحظة..دليل رجولته موجود..
و مش بس فى البطاقة..
دة غير ان محدش قال انه هيجى جنب خانة النوع اصلاً

ابراهيم إعتبر دى مهمته فى الحياة
و قعد يحارب المطالبين ببطايق نضيفة
و فالهم اللى مش عاجبه يعمل باسبور و يسافر
لأن البلد بلدنا

النقطة الواجب ذكرها هنا
إن البطاقة مش هى اللى بتمشى صاحبها..
يعنى ملايين مكتوب فى بطايقهم دكر
بس فى منهم كتيير لا مؤاخذة....
و فى مكتوب فى بطاقتها أنثى لكن تلاقيها بـ 100 دكر
و فى اللى دكر و هو فعلاً دكر
اذاً خانة النوع فى البطاقة مش هى اللى هتجيب الناس قدام
و لكن لو كل شخص طبق كلمة دكر فى حياته و شغله
هيبقى ساعتها راجل بغض النظر عن بطاقته
و مش محتاج يعمل مليونية للتأكيد على إنه دكر
و الأولى إنه يفكر هيبقى دكر فعلاً ازاى



ملحوظة هامة:
أنا سراج الدين كامل أبنى حياتى على ثلاث حقائق
أننى ذكر..مسلم..أعذب
و لن أقبل الطعن على أول حقيقيتين على الأقل
فان كنت تناقش أهلاً بك
أما لو هتكفرنى فبلاش عشان متاخدش ذنب

Sonata

بعد أن حياها بانحناءة بسيطة
توجه بخطىً ثابتة نحو البيانو المستقر وسط المطعم
جلس على الكرسى و حرص على جعل ظهره مستقيماً دون انحناء
نظر اليها مرة أخيرة قبل أن يبدأ بالعزف

كانت هى تسند وجهها على يديها, تنظر اليه مبتسمةً فى رقة و ترقب
كانت تحب تلك اللحظات عندما يحلّق بها فوق السحاب بعيداً عن الناس
حيث يجلسان سوياً مع "شوبرت" و "فرانك ليزت" فى جزيرة وسط المحيط
يذوبان فى متتالياتهما أثناء تناول عصير جوز الهند..
كانت تحب عندما يمسك "فيفالدى" بالكمان ليسير الى جوارهما بينما يتمشيان على الشاطىء
فى ليالى الصيف الرطبة..
حينما يظهر "شوبان" على البيانو الذى تجره حيوانات الرنة ذات الأجراس
كى يلقى عليهما تحية المساء بينما يستلقيان على العشب يعدان النجوم

ها هو الان ينخرط فى الدق على أوتار البيانو ليروى فصلاً جديداً
من قصة حبهما..
تخرج النغمات من قلبه الى يديه مباشرة..
تحرك قدماه على البدال..
ينتقل من سلم الى اخر فى سلاسة تامة..
تتفاعل معه أوتار البيانو..تفهم ما يريد أن يقوله و تتفق معه فى ذلك
يغمض عينيه تترنح رأسه طرباً..يراهما و مازالا طفلين صغيرين
يلهوان فى بستان ملىء بالزنابق البيضاء التى تتمايل معهما على تغريد العصافير الملونة..

كم يتمنى لو تطل معزوفته هذه للأبد..
كم يتمنى لو يصبح الواقع مثل الخيال أو جزءاً منه حتى..
كم تمنى أن يعيشا معاً داخل البيانو!

انتهى الان من العزف وسط تصفيق من الحضور
الذى انقطع فجأةً على صوت عالٍ قادم من الخارج

-أخفض صوت ذلك الشىء و كف عن الطرق على لوحة المفاتيح هكذا..سوف تتلفها
قالها أخوه ثم اغلق باب الغرفة و انصرف

عاد لها مرة أخرى فالآن موعد رقصة الفالس على أنغام الدانوب الأزرق لصديقهما "شتراوس"!

تمت

Palestine Or Israel

Palestine Or Israel

الغرق بين التفكير و البطيخ

نشرت الشمس اشعتها الذهبية باكراً..

"يانى" يلهو مع اصدقائه بالقرب من الحى الملكى ..

الفنار القديم .. يزهو بارتفاعه وسط الميناء..

قصة حب بين اوكتافيا و هيروفيلوس

تحيط بهما الزنابق البيضاء و الفراشات اللاهية..

منبع المعرفة .. أرض الابداع اللا محدود

اقليدس و هيبارخوس فى بهو المكتبة..يغرقان فى التفكير

فى البلاط الملكى .. يجلس بطليموس

ألحان القيثارة تحلق بسامعيها لأبعد النجوم..

هيباتيا تسحل فى الطرقات..

احترقت المعرفة..غرقت المدينة

...

الساعة الثانية ظهراً .. الشمس فى منتصف السماء

القيظ يشوى الوجوه

بلية يضرب زملائه فى حى الجمرك

القلعة تنزوى جانباً من الحزن

وسط باعة الترمس و الذرة المشوى

قصة حب بين حميدو و بطة

تحيط بهما عوادم السيارات و ضجيج الورش

فى القصر أو الذى كان قصر

يجلس احدهم بنظارة سوداء و جهاز تفتيش.. يأكل التين الشوكى

سعد الصغير يمدح العنب

الشعب يغرق فى مياة البطيخ

برعى يأخذ على قفاه..

فى طريقه للمعتقل..

و فى انتظار غرق المدينة !!

سينا .... إيجار جديد

فلسطين .... اسرائيل .... دور ريادى .... الوضع ف المنطقة .... لا جئين ..... ضرايب .... وناس بتموت ...ومش لاقيا .... وسور حاجز .... وجدار حديد .... وتهريبات ... وتصريحات .... وتفجيرات ... وشوية يقولوا خلاص .... وشوية يقولوا اخوات .....

طب بما ان وإذن:

ما تيجى نعملها ايجار حديث

سينا نصها ارض مشتريها يهود على اجانب

والنص التانى صحرا وبور ... ولا هنبنى ولا نيلة

لا لينا فيها جيش و لا شرطة و لا سيادة ولا حاجة

مجرد حتة ع الخارطة ....

وكام صفحة فوسط كتاب تاريخ ممسوح ومترقع .... ومتذوق ومتلمع ... ومكتوب عالمزاج ....

ولو راحو .... ولا هنسأل

ولو نسأل .... ده مين هيرد؟!

ما تيجى نجيبها ما لأخر ....

ونأجرها ... إيجار حديث ...

والأولوية لأخواتنا نأجرها ل فلسطين كام سنة وبعدها نكروشهم منها ....

ونسكن اللى يدفع اكتر .... وممكن نديها للاجئين لو هيدفعوا .....

ولو طلبت امريكا .... ولا اين كان .... نديهالوا ....

وممكن نعمل خصم 10 % لأول 10 مستأجرين مثلاً

او ممكن ندى لى هيدفع اكتر حتة من القناة ياخد منها ضرايب ...

واحنا كمان نطبق بقى عليه قانون ضريبة الممتلكات ... والضريبة التجارية ... وقانون الأسكان الجديد ...ونلم

ومادام مش بتاعتنا فى كل الأحوال ....ما تيجى نبيع

ثرثرة فى بحرى

قبل غروب الشمس بقليل
سرنا متجهين من رأس التين الى ميدان المساجد

-عارف يا مصرى؟
كان نفسى اكون عايش فى الستينات
الناس كلها كانت نفسها حلوة
عارف الحتة دى كانت كلها يونانيين

بص القهوة دى..عفى عليها الزمن
شايف الراجل العجوز اللى قاعد برة دة؟
أراهنك انه مهموم كدة عشان الزمن بقى غير الزمن
ما هما البُقّين دول اللى بنسمعهم من أى حد كبير

تفتكر يا مصرى لما نكبر هنقول زيه كدة؟

"كان ماشياً شاخصاً ببصره للأمام ..حاملاً حقيبته الفارغة التى تلازمه دائماً على كتفيه..
رابطاً الشال الفلسطينى حول رقبته..
لا يلتفت إلى..
و لا يبادلنى الحديث..

" مر بجوارنا الترام الأصفر قاطعاً الحديث ذو الطرف الواحد
التزمت الصمت لبرهة
دخلنا الى ميدان المساجد عندها كان الظلام قد حل"

***********
على البوابة من الداخل
جلس ثلاثة عساكر و صول
كونت ظهورهم مع ظهر الكرسى و مقعده مثلث قائم الزاوية
يباهون بكروشهم المارة..ممسكاً أحدهم بجهاز لاسلكى تنطلق منه أصوات مشوشة
و صوت أحد هم مشاركاً اياهم عدة دعابات

تقدمنا قليلاً باتجاه مسجد أبى العباس المرسى
حيث جلس على مقربة منه بعض الناس
لتناول الترمس و اضافة بعض الزركشات للأرض المطعمة بكافة انواع المسليات

اخترقنا صفوف الأطفال اللاهين و انا مستمر فى حديثى

يا مصرى أهم حاجة عشان البلد دى تتعدل ان الناس تفوق
و تفك دماغها من الكورة بقى
و ماتشات الجزاير و الافلام دى
مش معقولة عملنا التحف دى كلها و يبقى حالنا بالشكل دة
شايف المسجد دة مثلاً
روعة يا مصرى
شوف كنا بنعمل ايه زمان؟
شايف النقوش اللى على القبة .. شايف المئذنة ارتفاعها قد ايه؟
انا كل لما اجى هنا بتبسط من البلد
و مش بفقد الأمل اننا ممكن فى يوم من الايام نرجع
...كنا عباقرة يا مصرى


لم يرد و لم يستدر حتى لكنه جذبنى من يدى
متجهاً الى لوحة أمام المسجد كتب عليها:

" مسجد العارف بالله أبى العباس المرسى
تصميم الايطالى ماريو روسى....
........"

لم أقرأ الباقى ..

-احنا ندخل نلحق المغرب احسن يا مصرى

كففت عن الثرثرة و تشاركنا نحن الاثنان الصمت لبقية اليوم

طفولة

فى الممر الضيق بين السور الأصفر العالى ، وحمامات المدرسة .. كان يجلس

ينظر من خلف جدار الحمامات البعيد ، بحذر شديد ،الى الوجوه البغيضة التى تبحث عن متعتها اليومية فى صباحات المدرسة المملة .

من بعيد يرى الفتى الذى قطع له زر المريلة العلوى بالأمس يقترب منه فيجفل عائداً خلف الجدار يختبئ.

رائحة البول المختلط بطين الحمامات يصيبه بالغثيان ، فيعيد ما تبقى من الساندويتش الصغير الى جيب المريلة .

ينظر الى الجرح الكبير فى جانب حذائه ..
الخياطة المتينة لم تجعله ((احسن مية مرة )) من الجديد - كما وعدته امه - بل حتى انها لم تشفع له امام الأوغاد الذين تهكموا عليه ، حتى البدين (( الفشلة )) الذى يقبع آخر الفصل ضحك كثيراً حين رآه.

خلع الحذاء ووضعه الى جواره ، رفع سبابة وابهام يده اليمنى التى يجديد التصويب بها ، وصنع منها مسدس صغير يطلق منه رصاصات خفية على رؤوس الأوغاد .

يصوب نحو ((الفشلة )) فيسقط ..
يصوب نحو الفتى الذى قطى ازرار المريلة .. فيسقط
على مدرس الحساب الذى ضربه (( بسيف المسطرة )) عقاباً على الكراس الذى لم يأت .. فيسقط
ويستمر حتى يمتلئ الفناء بجثثهم .

يعيد الحذاء الى قدمه ، ينظر الى الدماء التى تسيل بالقرب منه ... ويبتسم


تمت